搵工做
喺英國搵工做
喺一個新嘅國家搵工做確係充滿挑戰，但係英國都有好多聽都未聽過嘅工作機會，而所有 BN(O) Visa 嘅持有者都有權喺英國讀書同埋工作。
國民保險 (National Insurance)
要喺英國工作，你首先需要申請國民保險 (NI) 號碼。國民保險其實就係英國嘅社會福利制度，包括退休金計劃。
國民保險號碼可以喺網上申請，你亦可以致電國民保險申請熱線 0800 141 2079 索取申請表。
當你寄回表格時，必須連同身份證明同埋工作權利證明 (例如: Share Code) 一併寄回。你可能需要等最多四個星期嘅時間，先至會收到你嘅國民保險號碼。
如果你已經搵到工作，你可以喺收到國民保險號碼之前開始工作。雖然你並唔需要等攞到國民保險號碼先可以開始工作，但你都應該盡快申請，以免影響出糧時所收到嘅薪金。
有關申請國民保險號碼嘅更多資訊，請瀏覽政府官方網站。
薪金和最低工資
英國嘅平均工資取決於你所居住嘅地區、年齡、以及工作類型。
英國有法例規定嘅「全國最低工資」水平，並且每年都會更新。「全國最低工資」適用於離校年齡至 20 歲之間嘅人。
「全國生活工資」比「全國最低工資」略高，適用於 21歲或以上嘅人，並適用於兼職，臨時工作以及全職工作。
2024/25 年，「全國最低工資」按年齡為每小時 6.4 至 8.6 英鎊。 而「全國生活工資」為每小時 11.44 英鎊。
2025/26 年，「全國最低工資」按年齡為每小時 7.55 至 10 英鎊。 而「全國生活工資」為每小時 12.21 英鎊。
點擊呢度可獲取更多關於「最低工資」及「生活工資」嘅信息。
稅款
喺英國，你必須為每年超過 12,570 英鎊嘅任何收入繳納稅款。如果超過呢個門檻，「應付所得稅」嘅金額就取決於你嘅收入。
大多數嘅工作，稅款同埋國民保險 (NI) 繳款係通過你嘅僱主直接支付，呢個安排稱為「按收入付費 (Pay As You Earn)」 (PAYE)。如果你係自僱人士，則需要自行申報 (Self Assessment) 同埋直接繳納所得稅。
喺英格蘭、威爾士同埋北愛爾蘭，如果你嘅年薪係喺 12,570 至 50,270 英鎊之間，所得稅率為 20%。如果你嘅年薪更高，稅率為 40% 或更多。喺蘇格蘭，稅率相似，但稅率類別更多。
點擊呢度以獲取更多有關所得稅嘅資訊。
你亦可以觀看呢段影片，以了解英國嘅稅制。
就業法和權利
當你開始一份新嘅工作時，通常僱主會要求你先簽署一份合約。 呢份合約應該包括你嘅工作時間、薪酬、年假權利同埋終止合約嘅通知期等詳細信息。
全職工作通常每週工作 35-40 小時，每週最多工作 48 小時，但如果你願意，你可以選擇延長工作時間。
全職員工嘅年假至少為 28 日，當中包括 8 日嘅銀行假期 (Bank Holiday)。
如果你病咗，你有權放取病假。 如果你請病假超過 7 天，就需要提供醫生證明（稱為“病假證明”或“健康證明”），以向你嘅僱主證明你生病。
以下為一些有用嘅資源：
點搵工?
我哋可以利用好多渠道搵工，例如英國政府提供嘅“搵工作”服務，你亦可以利用以下求職招聘網站，喺唔同城市尋找唔同類型嘅工作:
- Monster: monster.co.uk
- Reed: reed.co.uk
- TotalJobs: totaljobs.com
- Indeed: uk.indeed.com
- jobsite: jobsite.co.uk
你更可以喺LinkedIn 上設置個人資料，並使用你嘅人際網絡尋找幫到你嘅聯繫，甚或工作。
泰晤士報、衛報和每日電訊報等全國性報紙都設有招聘版面，尤其係專業同埋研究生職位。
請確保你嘅履歷係最新嘅，並且以英國嘅格式準備。關於撰寫英式履歷，請睇呢份由港僑協會製作嘅有用指南。
學歷及資格
要了解你嘅學歷、技能、以至專業資格如何轉移到英國，請查看英國官方認可機構 Ecctis 嘅網站。你可以根據你嘅專業領域申請一份聲明，並利用該聲明向僱主展示你嘅資格與英國同等學歷嘅比較。呢個服務大約需要 50 英鎊。